Fiza_ali

فضا علی گانے کی شوٹنگ کے دوران گر کر زخمی ہو گئیں

EjazNews

فضا علی کے زخمی ہونے کی ویڈیو سوشل میڈیا پر وائرل ہورہی ہے جس میں گرنے کے بعد ان کے چہرے پر تکلیف کے آثار دیکھے جاسکتے ہیں۔

اداکارہ فضا علی مقامی گلوکار ‘ملکو کے ساتھ اپنے آنے والے مشترکہ گانے کی میوزک ویڈیو کی شوٹنگ میں مصروف تھیں کہ حادثے کا شکار ہوگئیں۔
فضا علی گانے کی شوٹنگ کے دوران مٹی کے بڑے ٹیلے سے گریں جس کے باعث انہیں سر اور کمر پر چوٹیں بھی آئی ہیں۔

اس حوالے سے گلوکار ملکو کے منیجر قیصر ندیم نے ڈان نیوز ڈاٹ ٹی وی کو تصدیق کی فضا علی گانے کی شوٹنگ کے دوران زخمی ہوئیں۔

منیجر کا کہنا تھا کہ صوبہ پنجاب کے شہر قصور کے نواحی علاقے میں ان کے آنے والے گانے کی شوٹنگ جاری تھی کہ اداکارہ زخمی ہوگئیں۔

انہوں نے بتایا کہ فضا علی اور گلوکار ملکو نے ‘جانی گانا گایا ہے تاہم اداکارہ کے زخمی ہونے کے بعد شوٹنگ روک دی گئی۔

یہ بھی پڑھیں:  عمر شریف کی امریکہ روانگی، ریما اپنے شوہر کی مشکور

منیجر کا کہنا تھا کہ فضا علی کو معمولی زخم آئے ہیں اور انہیں بروقت طبی امداد پہنچائی گئی، جس کے بعد انہیں روانہ کردیا گیا۔

خیال رہے کہ فضا علی نے 15 سال کی عمر میں ماڈلنگ کا آغاز کیا تھا بعدازاں انہوں نے ٹی وی اداکار نعمان اعجاز کی تجویز پر اداکاری میں قدم رکھا تھا۔
اداکارہ فضا علی اب تک ڈیڑھ درجن سے زائد ڈراموں میں کام کرچکی ہیں اور انہوں نے فلم ‘کاف کنگنا میں بھی اداکاری کی تھی۔

وہ مارننگ شو سمیت گیم شو کی میزبانی بھی کررہی ہیں جبکہ 2012 میں انہوں نے لاہور کے ایک کاروباری شخص سے شادی کرلی تھی، جس کے بعد وہ کراچی سے لاہور منتقل ہوگئیں۔

فضا علی کی ایک بیٹی فرال ہے اور وہ اپنی بیٹی کے ساتھ سوشل میڈیا پر اکثر تصاویر شیئر کرتی رہتی ہیں۔

اپنا تبصرہ بھیجیں