گھر میں بیٹھے کام کرنے کیلئے بہترین پلیٹ فارم ہے Linked in

linked_in
EjazNews

آپ نے نیلے رنگ کے آئیکن میں Linked Inضرور کسی سوشل میڈیا یا ایسے کسی اور پلیٹ فارم یا ویب سائٹ پر ضرور دیکھا ہوگا۔لیکن کیا آپ نے کبھی غور کیا ہے کہ یہ Linked inہے کیا۔ تو میں آپ کو لنکڈ ان کے بارے میں بتاتا ہوں جس پر آپ گھر بیٹھ کر بھی پیسے بنا سکتے ہیں۔ اگر آپ میں پروفیشنل صلاحیتیں ہیں تو یقین کیجئے کہ بہت سے لوگ آپ کے منتظر ہیں جو آپ کی صلاحیتو ں سے فائدہ اٹھانا چاہتے ہیں۔
لنکڈاِن معیار کو تعداد پر ترجیح دیتا ہے۔ تعلقات کو پروان چڑھانے کے لئے معیاری کام اور خدمت کی کلی ضمانت آپ کو ہنرمندوں کی دنیا میں باوقار بنا سکتی ہے۔ سب سے پہلے اپنی صلاحیتوں کا جائزہ لیں کہ آپ کیا جانتے ہیں؟ کتنا جانتے ہیں؟ مزید کون سا ہنردرکار ہے؟ لنکڈاِن کوالٹی ٹائم کا تقاضا کرتا ہے، یہاں لوگ آپ سے اس وقت ملیں گے جب آپ ان سے ملنا چاہیں گے۔ بروقت رابطہ، بروقت کام اور خلوص دل سے ایک دوسرے کی بات سننا، لنکڈاِن کا مزاج ہے۔ یہ اسٹریٹجک تعلقات کو پروان چڑھاتے ہوئے کیریئر میں کامیابی سے ہمکنار کرنے میں اہم کردار اداکرتا ہے۔
لنکڈان پلیٹ فارم کیریئر اور بزنس پروفیشنلز کے لئے کسٹمرز، کلائنٹس اور پارٹنرز سے رابطے اور تعلقات عامہ استوار کرنے کا بہترین اور بیش قیمت ماخذ ہے۔ اسے کاروبار کرنے والوں، فری لانسرز اور ملازمت کے متلاشیوں کا آئیڈیل پلیٹ فارم بھی ماناجاتا ہے۔لنکڈان ایک سوشل نیٹ ورک ہے، جسے خاص طور پر بزنس اور کیریئر پروفیشنلز کے درمیان رابطے کے لئے بنایا گیا ہے۔
دیگر سوشل نیٹ ورکس کے برعکس، جہاں آپ دوستیاں بناتے ہیں، یا پھر اپنے خیالات کا اظہار کرتے ہیں اپنی نت نئی تصاویر اپ لوڈ کرتے ہیں ان کی بانسبت لنکڈان پر اسٹر ٹیجک تعلقات قائم کیے جاتے ہیں۔ لنکڈان میں تعداد کی بجائے معیاری کنیکشن قائم کرنے پر توجہ دی جاتی ہے۔ اس سائٹ پر آپ کو پاکستان سمیت ہر ملک اور ہر صنعت سے وابستہ لوگ ملیں گے۔
لنکڈان کا اپنا پلیٹ فارم اور سسٹم ہے، جو دیگر سوشل نیٹ ورک سائٹس سے قدرے مختلف ہے۔ یہاں آپ کو سنجیدہ اور کاروباری لوگ ملیں گے، یہاں تفریح کیلئے ویڈیو شیئر کرنے یا تصاویر پوسٹ کرنے کو کوئی پسند نہیں کرتا۔ یہاں آپ کا چہرہ نہیں بلکہ ہنر اور تعلیم کام کرتی ہے۔ لہٰذا، لنکڈاِن ممبر بنتے وقت سنجیدگی، معیاری کام اور صلاحیت کو مدنظر رکھیں۔
اب سوال یہ پیدا ہوتا ہے کہ لنکڈ ان پر کام کیسے کریں؟ ۔تو اس کیلئے آپ کو پروفائل بنانے کیلئے سب سے پہلے آپ کو لاگ آن کرنا ہو گا۔ ایک عام پروفائل کی کوئی فیس نہیں ہوتی لیکن اگر آپ پریمیم کیریئر، بزنس پلس، لنکڈان لرننگ اور سیلز نیوی گیٹر وغیرہ جیسی سروسز حاصل کرنا چاہتے ہیں تو پھر اس کیلئے آپ کو سبسکرائب کروانا ہوگا۔ تاہم بنا فیس والی بنیادی سروسز پر بھی کئی افراد اور گھر سے کاروبار کرنے والے لوگوں کے لئے ایسے فیچرز دستیاب ہیں، جن کے ذریعے وہ خود کو ہنر مند اور کاروباری دنیا کے سامنے متعارف کروا سکتے ہیں۔ مثلاً ہنرو تجربے پر مبنی اپنامکمل پروفائل بناسکتے ہیں، محدودپیمانے پر دوسروں تک پروفائل کی رسائی کو یقینی بنا سکتے ہیں، ایک وقت میں100پروفائلز دیکھ سکتے ہیں ا ور تین سرچز کو سیو کرسکتے ہیں۔ اس کے علاوہ لنکڈان پر آپ کی پروفائل دیکھنے والے خواتین و حضرات کی اطلاع بھی ملتی رہے گی، جن سے روابط بڑھا کر آپ تعلقات کو وسعت دے سکتے ہیں۔لیکن اگر آپ اپنی صلاحیتیں بھرپور طریقے سے دنیا کے سامنے لانا چاہتے ہیں تو پھر آپ کو ان کی فیس ادا کرنا ہوگی۔ لیکن ہمارا مشورہ ہے کہ اگر آپ نئے ہیں تو پھر آپ کو شروع میں اس کو سمجھنے کیلئے بغیر فیس کے پروفائل بنانا چاہئے۔
پروفیشنل پروفائل میں نام سے زیادہ آپ کا ہنر اور بات چیت کا انداز بہت معنی رکھتا ہے۔ اگر آپ موجد ہیں اور نت نئی چیز بنانے کے شوقین ہیں تو مکمل پراڈکٹ پروفائل موجود ہونی چاہئے۔ پروفائل مکمل ہو جائے تو سب سے پہلے ان لوگوں سے روابط استوار کریں، جو آپ کے ماضی میں کاروباری شراکت دار رہ چکے ہوں۔ لنکڈان کو تجدید ملاقات کا فورم بنائیں۔ ہنرمندوں اور صارفین سے مستقل رابطے میں رہنے کی کوشش کریں۔ ہوسکے تو اس کیلئے دن میں مخصوص اوقات مقرر کریں اور احباب کو بتائیں کہ شام سات بجے یا شب 10بجے ملاقات ہو گی۔ یہی عمل ملازمت پیشہ اور ملازمت کے متلاشی افراد بھی کرسکتے ہیں، جس کیلئے انھیں اپنی فیلڈ کے لوگوں سے رابطہ کرنا ہوگا۔
لنکڈان آپ کے لئے ہوم بزنس شروع کرنے اور اسے پروان چڑھانے میں ممدو معاون ثابت ہو سکتا ہے۔ یہ پلیٹ فارم پروفیشنلز سے بزنس اور انڈسٹری کے بارے میں معلومات کا تبادلے کرنے اور ایسے سرمایہ کار ڈھونڈنے میں مدد کرسکتا ہے، جو آپ کے کاروبار کی کامیابی میں کردار ادا کر سکیں۔ یہاں آپ کلائنٹس،کسٹمرز اور ساتھیوں سے خود کو متعارف کراتے ہوئے ان سے کامیاب کاروباری مشورے لے سکتے ہیں۔ یہاں آپ اپنی صلاحیتوں کے مطابق مستقل یاآن لائن ملازمت کے مواقع بھی پاسکتے ہیں۔ آپ کو HRپروفیشنلز بھی مل سکتے ہیں، جو اپنے ادارے کی خالی اسامیوں کیلئے باصلاحیت افراد کی تلاش میں ہوتے ہیں۔ اس کے علاوہ کسی ادارے میں اعلیٰ عہدے پر کام کرنے والے شخص سے رابطہ قائم ہونا آپ کو ملازمت کے بہترین مواقع دلاسکتا ہے۔ لنکڈان پرآپ اپنی پسند کے کئی گروپس کے ساتھ بھی رابطے میں آ سکتے ہیں ۔

اپنا تبصرہ بھیجیں